Lois Pereiro chega a 19 países da man de Política Lingüística

A través dos máis de 40 centros de estudos galegos da secretaría xeral, a obra e a vida de Lois Pereiro difúndese en España, Alemaña, Croacia, Finlandia, Francia, Hungría, Italia, Irlanda, Polonia, Portugal, Reino Unido, Rusia, Arxentina, Brasil, Chile, Cuba, Estados Unidos, México e Uruguai. A mostra sobre Lois Pereiro que se está a exhibir nestes países titúlase «Lois Pereiro e as artes da palabra. Rúa da poesía, poesía da rúa» e é un dos traballos gañadores do Concurso-Exposición Letras Galegas 2011 da Secretaría Xeral de Política Lingüística, na que participaron numerosos centros educativos de Galicia. Os carteis desta exposición e mais os da premiada na categoría de educación infantil e primaria están accesibles na web da Xunta na sección de lingua galega.

Ademais da exhibición desta mostra, os centros de estudos galegos están a organizar diversas iniciativas e, deste xeito, impulsar a proxección exterior e o recoñecemento internacional da lingua e da cultura galegas. O centro de estudos galegos da universidade portuguesa do Minho foi unha das primeiras en sumarse ao programa de actividades para conmemorar as Letras Galegas. Facíao o pasado día 7 coa presentación do cancioneiro de música popular máis antigo do que se ten noticia, Ayes de mi País , unha compilación realizada por Marcial Valladares a mediados do século XIX e que foi recentemente editada por José Luís do Pico e Isabel Rei. A esta presentación, uníuselle un encontro con escritores de Galicia —entre eles, Marilar Alexandre, Teresa Moure, Carlos Quiroga e Lucía Novas— e do norte de Portugal.

Tamén en Portugal, o centro de estudos galegos de Lisboa colabora, con outras entidades, na organización de diversas actividades. Entre elas inclúense o encontro literario que terá lugar hoxe na Facultade de Ciências Sociais e Humanas, un relatorio sobre o Día das Letras Galegas a cargo de Luciano Rodríguez; a Feira do Libro Galego, que terá lugar desde maña ata o 26 deste mes; e un ciclo de cinema galego.

Por outra banda, o centro de estudos galegos da Facultat de Filologia da Universitat de Barcelona inauguraba esta semana a mostra bibliográfica Di-versos, ou a poesía entre o fanzine e o punk. Lois Pereiro, Manuel Rivas, Rompente…, que inclúe páxinas do facsimilar de Loia editado polo Consello da Cultura Galega. Este centro tamén organizou unha conferencia sobre Pereiro e presentouse a edición bilingüe galego-castelán da Obra completa , da editorial Libros del Silencio.

Outro exemplo das iniciativas no exterior para conmemorar as Letras Galegas promóveo o centro de estudos galegos da Facultade de Letras da Universidade do País Vasco, onde as poetisas María Lado e Lucía Aldao veñen de ofrecer un recital poético co gallo da mostra.