Vinte anos de ruta a Compostela

Segundo explicou o conselleiro do ramo durante a inauguración do proxecto, «a mostra percorre os logros do Xacobeo en cada un dos seus piares fundamentais, como son a promoción nacional e internacional, o fomento da producción e consumo da cultura, a restauración e posta en valor dos Camiños e a atención ao peregrino a través de rede de albergues». Catro bases que conforman o que os organizadores da iniciativa non dubidaron en considerar coma «un fenómeno universal que se convertiu na mellor carta de presentación da nosa terra perante o mundo».

O punto de saída desta ruta a través do tempo vén marcado pola creación da S. A. de Xestión do Plan Xacobeo. O ente, dependente do Goberno autonómico, que dende 1991 —e de cara ao Ano Santo de 1993— protagoniza os traballos de dinamización e posta en valor deste patrimonio histórico esquencido durante séculos. Así, o primeiro apartado da mostra que se lle propón ao visitante céntrase na dotación de servizos e rutas habilitadas para os camiñantes que emprenden esta andadura dende os numerosos trazados existentes. A segunda das paradas fai especial fincapé na edición do Códice Calixtino en galego, mentres que no terceiro paso se recordan os proxectos expositivos postos en marcha arredor deste fenómeno de masas. Ao fin do camiño, distintos materiais audivisuais sintetizarán a evolución deste eixe cultural.