Chegan os 128 participantes no programa «Reencontros»

En total, participan nas dúas quendas desta edición 192 persoas procedentes de Arxentina, Cuba, Uruguai e Venezuela. Cómpre sinalar que este plan complementa ao «Volver á Casa», no que Emigración colabora aboando unha porcentaxe do 60% do custe da pasaxe, que no caso dos residentes en Cuba e Venezuela sobe ata o 80%. Aínda que tódolos participantes son maiores de 60 anos, condición sine qua non para ser beneficiario, a idade media supera amplamente esta cifra, xa que se aproxima aos 73 anos. Os de meirande idade son unha beneficiaria procedente de Arxentina, que conta con 86, e dous procedentes de Cuba e Uruguai, con 85. Son 125 emigrantes galegos que, xunto con 67 cónxuxes, totalizan as 192 persoas que participan na edición deste ano do programa.

Son nados nun total de 83 concellos galegos. Sobresaen como municipios nos que naceron máis participantes Malpica, Arteixo e Fisterra na provincia da Coruña; Monforte de Lemos e Palas de Rei na de Lugo; Gomesende en Ourense; e Vigo, Meis, Poio, Redondela e Salvaterra do Miño, na de Pontevedra. Canto se refire á distribución por países de procedencia, da República Arxentina veñen (sumando os participantes nas dúas quendas) un total de 117, por 54 de Uruguai, 8 de Cuba e 2 de Venezuela, ata completar os 192 totais. Acompáñanos cinco persoas: catro médicos e un coordinador. Respecto dos 65 cónxuxes, o 64% dos mesmos son nados/as fóra de España, un 6 % son nados en España pero fóra do territorio galego, e o 30 % restante son nados na comunidade galega.