«Crebinsky» é a película española máis vista nas salas de cine da Comunidade

Logo de dúas semanas na carteleira, a premiada cinta «Crebinsky» non tardou en erixirse como a película española máis vista nos cines desta Comunidade, cunha recadación media por sala, entre venres e sábado, próxima aos 2.000 euros. Segundo os representantes da cinta, estes datos garanten a continuidade do filme en todos os cinemas nos que se está a proxectar, e que se corresponden coas localidades da Coruña, Vigo, Santiago de Compostela, Lugo, Narón e Vilagarcía. Trátase dunha historia cómica e verdadeiramente surrealista que semella convencer ao público e que só se viu superada polas superproducións estadounidenses que competían cun maior número de copias.

Esta longametraxe, rodada en catro idiomas e definida polos seus creadores Enrique Otero e Miguel de Lira como «realismo fantasioso», tamén se está a ver fóra das fronteiras galegas, en cines de Barcelona, Madrid e Girona. A partires desta semana, á lista súmanselle Málaga, Alicante e Valencia.

Parte do éxito deste proxecto reside no elenco do ben acollido filme, encabezado polo internacional Luis Tosar e por outras caras coñecidas do panorama audiovisual español, como Miguel de Lira, Sergio Zearreta, Celso Bugallo, Patricia de Lorenzo e Farruco Castromán, entre outros. Dirixida por Enrique Otero, esta rompedora historia nace en 2002 como unha curtametraxe á que anos máis tarde o seu creador voltaría dando forma e sentido ao xa coñecido como Universo Crebinsky.

Miguel de Lira (Feodor) e Segio Zearreta (Mijail) son dous irmáns aos que as chuvias torrenciais arrastran cando son pequenos, xunto coa súa vaca Muchka, a un lugar perdido da costa. Illados do mundo e dos acontecementos bélicos que os rodean, crecen ao pé dun faro, sobrevivindo de recoller as cousas que trae o mar, as crebas. Alí crean o seu propio mundo: un universo particular de realismo fantasioso. O ritmo cotiá de convivencia coa súa vaca Muchka vese alterado cando esta desaparece. É entón cando os irmáns inician unha busca desesperada que os levará da costa cara ao interior, e na que toparán con nazis, falanxistas e soldados ianquis.

Esta sorprendente idea de partida valeulle aos creadores catro recoñecementos na gala dos premiosMestre Mateo 2010, sendo a segunda cinta máis valorada por detrás de «18 comidas» de Javier Coira.