POLA LINGUA
Os «Axóuxeres» inician en Arteixo e Miño a súa nova programación
A nova programación dos Axóuxeres iniciou onte o seu percorrido nos concellos de Arteixo e de Miño. As dúas localidades coruñesas son o punto de partida deste ano do programa co que a Secretaría Xeral de Política Lingüística busca favorecer a transmisión lingüística do galego no seo da familia. Logo de percorreren os pasados meses de setembro e de outubro as sete cidades galegas no formato de festas, Os Axóuxeres retoman a edición 2010-2011 a través dos Encontros dos Axóuxeres. Ás 12.00 horas pasaron polo Centro Cívico do Froxel de Arteixo e xa pola tarde, ás seis e media, visitaron o Local Social de Xarío de Miño.
Ata o mes de marzo, continuarán o seu percorrido polas catro provincias galegas a través dos concellos de Muros, Santa Comba, Redondela, A Cañiza, Tui, Vilagarcía de Arousa, San Cibrao da Viñas, Verín, Foz e Vilalba.
Constitúen un espectáculo participativo dunha hora de duración que conxuga as cantigas tradicionais, a música, o teatro e os xogos en galego das Festas nun formato adaptado ás poboacións e espazos de localidades máis pequenas. Nos Encontros, unha nena, Eli, axuda ao seu avó, o coñecido actor Xosé Manuel Olveira Pico, a atopar o caderno no que este garda os contos, os xogos e as cantigas que o facían feliz cando era neno. Os dous contan coa axuda de Totó, o boneco protagonista, que foi aprendendo a falar nas pasadas edicións.
Traballo para a casa
Co fin de darlle continuidade aos contidos dos Encontros, a Secretaría Xeral de Política Lingüística introduciu unha importante novidade na edición 2010-2011 do programa. Trátase dos Obradoiros dos Axóuxeres, que a través de cantos de arrolo tradicionais, de técnicas de masaxes para os bebés e de xogos de iniciación buscan axudarlles aos pais e nais a crear un maior vínculo co seu fillo nesta primeira etapa e, ao mesmo tempo, favorecer a incorporación do galego á comunicación entre os bebés e as familias. Para que a actividade poida seguir na casa, a Xunta pon a disposición dos pais e nais as músicas, letras, xogos e demais materiais relacionados coas Festas dos Axóuxeres, que poden atoparse na rede, no portal da Secretaría Xeral de Política Lingüística.
Esta funcionalidad es sólo para suscriptores
Suscribete
Esta funcionalidad es sólo para suscriptores
Suscribete