R. S. C.
SANTIAGO. A dirección xeral de Xuventude e Voluntariado está a organizar entre os estudantes de ESO e Bacharelato a primeira edición do Parlamento Xove, unha competición de debate entre centros de ensino da comunidade autónoma na que os participantes deberán integrarse en diversos equipos para investigar, escribir e discutir sobre o tema proposto pola organización. Nesta primeida edición, o tema será se o uso das redes sociais separa ou une á mocidade. A iniciativa dividirase en dúas fases. Unha inicial de investigación e argumentación de ideas e outra final no que terá lugar o debate dialéctico en galego. O obxectivo principal da actividade, explica a dirección xeral de Xuventude, «é que os estudantes poidan amosar as súas habilidades a nivel persoal e de grupo na selección de información, na expresión escrita e oral, na creatividade e no traballo en equipo». Ata o 15 de febreiro, todos os centros interesados poderán inscribirse na actuación, mentres que do 15 a 28 de febreiro terá lugar a entrega dos artigo. O día 26 de marzo, o departamento de Xuventude anunciará os equipos que pasarán á fase do debate, que se celebrará o 24 de abril.
Para anotarse ao Parlamento Xove, os centros de ensino deberán comunicar a súa intención nos teléfonos 981 545 822 ou 981 541 689. Cada un dos equipos estará formado por seis alumnos e un profesor. Cada centro poderá anotar a dous equipos, aínda que o segundo que inscriba estará nunha lista de espera. O formulario pode descargarse na en www.xuventude.net.
