En Vídeo
En imágenes
O arquitecto Roi Alonso presenta «Fragmentos», un percorrido polos edificios máis sobresaíntes da capital
Día 19/02/2012
A compostelana Casa da Conga albergou onte a presentación da mostra fotográfica «Fragmentos», firmada polo arquitecto vigués Roi Alonso. Unha serie composta por vinte imaxes de 25x50 centímetros en branco e negro e impresas en papel con paspartú que se aproxima, en palabras do seu autor, «á realidade construída da capital galega», seleccionando coidadosamente as mensaxes visuais que transmite aos seus paseantes e buscando o momento e a perspectiva para presentar unha nova realidade arquitectónica. «Trátase da miña visión persoal da cidade, xa que o interese non está na representación da realidade senón na abstracción plástica que desta se nos presenta», explica o autor.
A montaxe está formada por un centenar de caixas que rodean as paredes da sala de exposicións do Colexio, con copias en papel das fotografías expostas nas paredes para que a xente que visite a mostra poida levalas de recordo. Os visitantes tamén poderán achegarse a un proxector coas imaxes da exposición e algunha máis que forman parte da serie «Fragmentos perdidos» (aquelas imaxes rexeitadas para imprimir e montar na exposición fisicamente).
«Traballadas meticulosamente, coma se dun cadro se tratase, nunha búsqueda plástica en si mesma» —en palabras do autor— esta mostra fotográfica recolle as obras máis recentes e de interese da arquitectura contemporánea realizada en Santiago de Compostela e capta as mensaxes visuais que a cidade ofrece a todo aquel que a percorre.
Xogo de sombras
Así, Roi Alonso defende que a cidadanía está acostumada a percibir a arquitectura «desde a identificación dos seus volumes ou os espazos que xera», aínda que este proxecto fixa un marco para descubrir os pequenos detalles que se esconden detrás destas grandes obras, como a manipulación da perspectiva, o xogo de sombras, os reflexos e as texturas do materiais utilizados. Medios, todos eles, que axudan a mostrarlle ao espectador un mundo rico en matices e sensacións, onde a identificación do obxecto fotografado pasa a un segundo plano, tal e como poderán constatar os visitantes da mostra.
A exposición «Fragmentos» estará aberta ao público na sala de exposicións do Colexio de Arquitectos de Galicia ata o próximo 16 de marzo, de luns a venres en horario de 11.30 a 13.30 horas. Roi Alonso é socio da Asociación de Artistas Plásticos Galegos e nos últimos anos ten presentado varias exposicións, tanto colectivas como individuais. Foi nomeado fotógrafo do mes no número 120 da revista Digital Foto, grazas á reportaxe Dubai Comic.
