O actor pontevedrés Santiago Cortegoso Calvar, coa obra «0,7 % Molotov», foi a gañador da XIV edición do premio de teatro Rafael Dieste da Deputación da Coruña. O fallo foi dado a coñecer esta mañá, na sede da institución provincial, polo presidente da Deputación, Salvador Fernández Moreda, nun acto que contou coa asistencia da deputada responsable da área de Cultura; Caridad González Cerviño; o comisario do certame, Antonio Simón, e os membros do xurado Manuel Areoso, Elina Luaces, Alejandro Piñeiro, José Enrique Rivadulla e Teresa Moure. O concurso rexistrou nesta edición un notable incremento de participación, con 36 obras orixinais.
Moreda destacou que o premio, ademáis da dotación en metálico, de 6.500 euros, inclúe tamén a edición e posta en escena da peza teatral, que percorrerá varios concellos da provincia coruñesa, «o que supón unha importante proxección para a obra gañadora», e felicitou aos membros do xurado «pola selección das obras gañadoras deste certame en edicións anteriores, xa que todas elas obtiveron despois boas críticas e o respaldo do público coruñés e galego».
Neste sentido, destacou o éxito dalgunhas das obras galardoadas recentemente co Rafael Dieste, como «A ciencia dos anxos», de Inma Antonio; «Final de Película», de Gustavo Pernas; «Unha primavera para Aldara», de Teresa Moure, á que citou coma «a gran triunfadora dos premios María Casares deste ano» -obtivo sete galardóns, entre eles os de mellor espectáculo e texto orixinal-.
